كافة الحقوق محفوظة © 2021.
عصفورة المدينة تغرّد من قلب الحلبة… والطوشة مش رياضية!
سراب سبورت _
بطولة دولية قارية أُقيمت مؤخراً في عمّان… المفروض إنها ترفع الراية الأردنية وتجمّل الصورة، بس اللي صار على أرض الواقع كان سيناريو أقرب لمسلسل “الهيبة” من بطولة رياضية!
مدربين من المنتخب الوطني دخلوا في عراك علني، وتبادل للّكمات – مش خطط تدريبية – وأمام من؟ رئيس اتحادهم المبجّل، وبحضور وفود دولية! وما أنقذ الموقف إلا تدخّل الأمن… واللي على الأغلب صار يفك اشتباك بدل ما يراقب التنظيم!
السبب؟ بسيط جداً… أحد المدربين شغّال شفت صباحي مع اتحاد دولة جارة، وشفت مسائي معنا، وكأنها وظيفة عن بُعد! والجميل؟ الكل عارف وساكت، إلا زميله اللي “انفجر” وقال كلمته… بقبضة يده!
وهون العصفورة بتغرد بسخرية حزينة: طيب وين اللجنة الأولمبية؟ وين مندوبيها اللي “بيقبضوا بالدينار الأردني” عشان يراقبوا البعثات، ويمنعوا الطوش، ويتأكدوا من النزاهة؟ ولا يمكن الطوشة مش ضمن الوصف الوظيفي؟
السؤال الحقيقي: هل تمثيل الوطن صار فرصة للشغل المزدوج، وصفّ الحسابات، وتفريغ الغضب؟ ولا لازم نعمل دورة تدريبية في “ضبط الأعصاب” قبل ما نفكر نطلع منتخب؟